ZORAM TODAY| 10th September:  Tun thla ni 4 khan Dorjee Khandu Auditorium, Itanagar, Arunachal Pradesh-ah Ministry of Civil Aviation, Government of India bultumin North East Region Minister’s Conference on Civil Aviation buatsaih a ni.

He hunah hian Chief Minister Lalduhoma pawh a tel a, Union Minister for Civil Aviation Rammohan Naidu Kinjarapu leh Ministry of Civil Aviation a hotute Chairman, Airports Authority of India, Director General of Civil Aviation Asangba Chuba Ao, IAS, Joint Secretary , Ministry of Civil Aviation leh officers dangte nen One on One interactive session neiin, inkawmna hun tha tak an nei.

Chief Minister Lalduhoma chuan Ministry of Civil Aviation in Mizoram tana hma laksak tura rawtnate a tarlang.

Lengpui Airport enkawl dan turah Indian Air Force chuan an rawtna an rawn thehluh tawh a, Airport Authority of India lam hian rawtna a la rawn nei ve lo thung a, rawtna mumal tak an rawn neih hun hi kan nghah mek thu a sawi a. 

Hemi chungchangah hian Vipin Kumar, IAS, Chairman, AAI chuan Ministry of Home Affairs leh Ministry of Civil Aviation te nen meeting neia an bawhzui mek thu leh AAI lam hian September thla laihawlah chuan rawtna mumal tak an rawn thlen theih tur thu a sawi a. Hemi chungchangah hian CM chuan Airport ram hi AAI hnenah chuan Mizoram Land Revenue Act, 2013 in a phal angin lease a pek theih a nih thu leh Mizoram Sawrkar in airport atana sum tam tak a lo sen tawh chu AAI in an la dawn anih chuan reimburse ve tura a beisei thu a tarlang.

Lunglei District leh Champhai District ah Greenfield Airport kan mamawhna a sang hle a, kan neih theih chuan mipui tam takten an chhawr tangkai dawn a, India ram laili nena kan inzawmna a thuk sawt tur thu a sawi a.

Heng airport pahnih dinna tura hmalakna hmasa atan Pre Feasibility Study nei turin DoNER ah thehluh a ni tawh tih a sawi a. Union Minister chuan Ministry of Civil Aviation ah rawtna thehlut zawk turin a lo rawn a, thla khat chhungin Pre Feasibilty Study hi neih a nih tur thu a hrilh bawk a ni.

Regional Connectivity Scheme (RCS - UDAN) hnuaiah October, 2025 atang hian Pawan Hans Helicopter Service kan neih belh dawn a. Aizawl to Champhai, Aizawl to Lawngtlai, Aizawl to Parva bakah Aizawl to Silchar leh Churachandpur te a thlawk dawn a. Aizawl to Parva route chu customer an tam tawk dawn loh avangin route danga thlak turin Chief Minister hian Union Minister hnenah a thlen a, hei hi Ministry of Civil Aviation chuan an lo ennawn leh tur thu an hrilh a. He scheme hnuaiah Mizoram a helicopter service pawh tun aia ti tam lehzual tura ngenna Chief Minister hian a thlen bawk a ni.

Tui chunga tum thei chi thlawhna (seaplane) service tir theihna tur hmunhma pathum pali emaw vel Mizoramin a neih thu Chief Minister hian a sawi lang a. Union Minister chuan Ministry of Civil Aviation ah proposal thehlut turin a lo hrilh a, MoCA hian pre feasibility study an nei zui dawn a ni.

Hmarchhak khawpui dangte nena khaikhinin Kolkata – Aizawl thlawhna chuan man hi a sang fal hle a. Mi tam zawk ban phak a nih theih nan thlawhna chuan man tlawm zawk kan mamawh thu leh Aizawl – Kolkata leh Aizawl – Delhi thlawhna thlawk zat pawh hi tihpun kan mamawh thu Chief Minister hian a sawi a. Union Minister leh a team te hian IndiGo lam an lo biak tur thu an sawi.

Mizorama loneitute hian Horticulture product tha tak tak an tharchhuak hnem tawh hle a. Rang zawka phurhchhuahna a awm loh avangin state pawna hralh theihna remchang an nei mang thin lo. Lengpui Airport-ah hian Cargo Hub leh Cold Storage Facility kan neih erawh chuan heng kan thlai tharlam ber berte hi awlsam takin kan phurchhuak thei thung dawn a, hetiang hmunhma din theih dan tur Chief Minister hian Union Minister leh a team te hi a sawipui bawk a. Union Minister chuan AAI in Lengpui Airport an lak chhawn hunah hei hi chu a keng tel thei dawn tih a lo sawi a ni.